स्वाद पहिचान

क्रियाकलाप विधि

कम्तीमा ५ ओटा (गुलियो, पिरो, नुनिलो, टर्रो, र तितो) स्वाद भएका सामग्री तयार पार्ने । प्रत्येक सामग्रीलाई छुट्टाछुट्टै प्लेटमा राख्ने । शिक्षक वा सहजकर्ताले प्रत्येक वस्तुको स्वाद लिँदै नाम भन्ने र बालबालिकालाई एकएक गरी स्वादको नाम भन्दै चखाउने । फेरि सोही खानेकुरा दिएर खानेकुराको नाम र स्वाद भन्न लगाउने (जस्तै, चिनी खुवाउँदा चिनी गुलियो छ) । यसै गरी अन्य सबै स्वादका खानेकुरा पालैपालो चखाउँदै नाम र स्वाद भन्न लगाउन सकिन्छ । अन्त्यमा बालबालिकालाई आँखा बन्द गर्न लगाई छुट्टाछुट्टै खानेकुरा मुखमा राखेर कुन खानेकुराको कस्तो स्वाद छ भन्न (चिन्न) लगाउनुपर्छ । यो क्रियाकलापमा सबै प्रकारका अपाङ्गता भएका बालबालिकालाई समावेश गराउन सकिन्छ, तर दृष्टि र सुनाइसम्बन्धी वा विकासात्मक अवस्थाका बालबालिकालाई उपयुक्त निर्देशन दिनुपर्ने कुरामा ध्यान दिन जरुरी हुन्छ ।१• सावधानीः धेरै कडा स्वाद भएका खानेकुरा बालबालिकालाई चखाउनु हुँदैन ।