अङ्कपत्ती र अङ्कअनुसारको वस्तु गन्ने

क्रियाकलाप विधि

बालबालिकालाई शिक्षकले परिपरिर गोलो घेरा बनाएर राख्ने । अङ्कपत्ती र गिन्ती गर्न प्रयोग हुने सामग्री (उपलब्ध गेडागुडी वा ढुङ्गा) तयार गर्ने । तयार पारिएका सामानको परिचय दिने । अङ्कपत्तीलाई त्यहाँ रहेका अङ्क देखाउँदै, अङ्क भन्दै र भन्न लगाउँदै देब्रेबाट दाहिनेतिर राख्न लगाउने । एउटाएउटा अङ्कअनुसार गेडागुडीहरू गन्दै राख्न लगाउने (जस्तै, अङ्क एकको अङ्कपत्तीमुनि १ (एउटा) गेडा राख्न र १ उच्चारण गर्न लगाउने) । यसै गरी अन्य अङ्कपत्तीमुनि अङ्कअनुसारका गेडागुडीहरू राख्न लगाउने । सबै बालबालिकालाई पालैपालो यो क्रियाकलाप गर्न लगाउने । खेल्ने तरिकाबारे बालबालिकालाई उपयुक्त तरिकाले र स्पष्टरूपमा बताउने ।