स्वहेरचाह तथा तनाव व्यवस्थापन
अब हामी प्रारम्भिक बालविकास तथा शिक्षामा अपाङ्गता समावेशीकरण पहिलो भागको अन्त्यतिर आइसकेका छौँ । तपाईँहरूले ध्यान दिएर, मिहिनेत गरेर अघिल्ला सत्रहरू अध्ययन गर्नुभएकोमा फेरि पनि धन्यवाद तथा बधाई । प्रारम्भिक बालविकास केन्द्रमा बालविकास शिक्षकहरूले अपाङ्गता भएकासहित सबै बालबालिकाहरूको हेरचाह, विकास र शिक्षाका लागि महत्त्वपूर्ण भूमिका खेल्दछन् । यद्यपि ससाना बालबालिका र तिनका अभिभावकहरूसँग निरन्तर काम गर्दा कार्यबोझका कारण कहिलेकाहीँ तनाव पनि सिर्जना हुन सक्छ र शिक्षकले उनीहरूको सेवा र प्रभावकारिता कायम राख्न तनाव व्यवस्थापन र स्वहेरचाहलाई समेत प्राथमिकता दिनु आवश्यक हुन्छ । त्यसैले यस सत्रमा यहाँले स्वहेरचाह तथा तनाव व्यवस्थापन गर्ने तौर तरिका र यसको महत्त्वका बारेमा ज्ञान हासिल गर्नुहुने छ ।