एकीकृत परिवार सेवा योजना: परिचय तथा उद्देश्य

एकीकृत परिवार सेवा योजनाका उद्देश्यहरु

(क) प्रारम्भिक बाल्यवस्थाका बालबालिकामा हुन सक्ने अपाङ्गता तथा कार्यगत सीमितता पहिचान गरी अपाङ्गताको असर कम गर्नका लागि आवश्यकताअनुसार, हेरचाह, थेरापीहरू, औषधी परामर्श, पैरवी तथा संरक्षणका सेवा उपलब्ध गराउन सम्बन्धित निकायसँग सहकार्य गर्ने।
(ख) अपाङ्गता भएका बालबालिकाको सर्वाङ्गीण विकासका लागि आवश्यक पर्ने सहयोगहरू गर्ने ।  
(ग) बालबालिकामा हुन सक्ने बौद्धिक, शारीरिक, सञ्चार र सामाजिकीकरणसम्बन्धी कठिनाइहरू, सिकाइसम्बन्धी कठिनाइ, दृष्टि र सुनाइसम्बन्धी लगायतका सीमितता र कार्यगत सीमितता भएका बालबालिकालाई प्रारम्भिक समयमा चाहेको सहयोग र हस्तक्षेपका कामहरू गर्ने ।
(घ) परिवारका आर्थिक सामाजिक लगायत विभिन्न परिस्थितिजन्य कारणबाट बालबालिकाको सर्वाङ्गीण विकासमा बाधा पुगेको भए उक्त बाधा हटाउने उपायहरु खोजी गरी परिवारलाई सहयोग गर्ने ।
(ङ) सिकाइ आवश्यकताअनुसारको सिकाइ योजना तयर गरी बालबालिकाको सिकाइमा सहजीकरण गर्ने । बालबालिकाको सबल पक्ष, सक्षमता, अवरोध तथा रुचि पहिचान गरी सोहीबमोजिमका विकास तथा सिकाइका क्रियाकलाप सञ्चालन गर्ने।
(च) यसै गरी अपाङ्गता भएका बालबालिकालाई उनीहरूका अभिभावक र स्याहारकर्ताबाट विभिन्न प्रकारका सेवाको जरूरत पर्छ । यस्ता सेवाहरू पहिचान गरी तिनमा अपाङ्गता भएका बालबालिकाको पहुँच पुर्याउन सहजीकरण गर्नु पनि यस योजनाको एउटा उद्देश्य हो ।